PPA kinalampag sa panggigipit

MANILA, Philippines - Pumalag ang  isang kinatawan ng malaking shipping company sa umano’y panggigipit sa kanya ng pamunuan ng Philippine Ports Authority (PPA) na naging dahilan ng pagkakasibak niya sa trabaho at pagkalusaw ng kanyang maliit na ne­gosyo sa Vitas Terminal sa Tondo, Manila.

Kahapon ay  humi­ngi ng tulong sa media si Rudy Chan, dating kinatawan ng Whales Shipping Corporation makaraang sibakin siya bilang kinatawan ng naturang kompanya matapos ang umano’y panggigipit na ginawa sa kanya kaugnay sa inokupa niyang maliit na bahagi ng lupaing pag-aari umano ng National Housing Authority (NHA).

Nagsimula umano siyang pag-initan ng PPA nang magtayo siya ng maliit na negosyo ng scrap metal at gamitin ang bahagi ng lupang pag-aari umano ng NHA, malapit sa Pier 18.  Binig­yan aniya siya ng taning ng hanggang Nobyembre 30, 2013 upang umalis at bakantehin ang lote kung wala siyang maipapakitang dokumento na pinayagan siyang gamitin ang bahagi ng lote.

Depensa ni Chan, pansamantala lamang ang pag-okupa niya sa lote lalo na’t siya ang namamahala at nag-aasikaso sa  regular na pag-angkla ng ilang barge sa naturang lugar at nakahanda siyang makipag-ugnayan sa NHA para sa pag-okupa sa lugar.

Hiniling din ni Chan sa kanyang liham kay Clarissa Ignacio, Port Manager ng Port Ma­nagement Office (PMO) sa North Harbor ang kop­ya ng memorandum o agreement ng tanggapan na magpapatunay na sila ang may karapatan sa naturang lupain at hindi ang NHA.

Gayunman, sa kabila ng kanyang kahilingan, iginiit pa rin ng PMO  na nabigo si Chan sa hini­hingi nilang dokumento na magpapatunay na bi­nigyan siya ng karapatang okupahin ang lugar at inatasan na bakantehin na kaagad ang inokupang lote.

Sinabi ni Chan na sa halip na kampihan siya ng pinaglilingkurang kompanya, sinibak siya bilang kinatawan ng Whale Shipping Corporation at ipinalit sa kanya si Jose Lepiten  bilang opisyal na kinatawan na makikipag-transaksiyon sa PPA.

Ayon kay Chan, inipit umano ng pamunuan ng PPA ang pagkakaloob ng Berthing Permit sa kanilang kompanya dahil sa usapin kaya’t pinalitan siya bilang kinatawan ng naturang shipping corporation. Ang naturang permiso ay ipinagkakaloob ng tanggapan sa mga shipping company upang makapag-angkla ang kani-kanilang barko sa port terminal sa North Harbor.