Scalawags sa PNP sibakin! - PNoy

MANILA, Philippines - “Sibakin ang mga scalawags!”

Ito ang direktiba ni Pangulong Aquino kay Philippine National Police (PNP) Chief Director General Alan Purisima laban sa mga “bad eggs” na pulis na nagsisilbing batik sa imahe ng kapulisan upang maiangat pa ang kalidad ng serbisyo sa mamamayan.

Sa ika-112 taong ani­bersaryo ng Police Service Anniversary sa Camp Crame kahapon, sinabi ng Pangulo na panahon na para alisin ang mga scalawags sa hanay ng kapulisan upang mapag­serbisyuhan ng maayos ang mamamayan na tumutustos sa PNP sa pamamagitan ng mga buwis.

Aniya, kung mapag­lilingkuran ng husto ng mga pulis ang sambaya­nan ay tiyak na makakakuha ang PNP ng ma­­tinding kakampi sa kanilang paglaban sa kriminalidad.

Sinabi rin ng Pangulo na mabubura na ang bansag na mga “pulis patola” lalo na sa mga naka­talaga sa lalawigan oras na dumating ang bultu-bultong 9mm Glock Pistol sa mga susunod na buwan.

Sa tala ng PNP, nasa 37,578 units na ng Glock 17 9mm pistol ang nai-deliver mula sa 74,879 units para sa PNP na pinondohan ng halos P1.2 bilyon.

Tiniyak naman ng Pa­ngulo ang nakalaang P9 bilyong pondo para sa capability enhancement program ng PNP. Bahagi nito ang P2.86 bilyon na naipalabas na ng Department of Budget and Management noong nakalipas na linggo.

Nakatakda ring mag-hire ang PNP ng 30,000 sibilyang empleyado na siyang gagawa sa mga administrative work na dating ginagawa ng mga pulis sa kanilang mga tanggapan.

Bibili rin ang PNP ng karagdagang 50,000 long rifle bukod pa sa 2,000 patrol cars na ipamamahagi sa mga himpilan ng pulisya sa buong bansa.