Bus ban sa Las Piñas

MANILA, Philippines - Susunod na rin sa naging hakbang ng Maynila ang lungsod ng Las Piñas sa pagbabawal na makapasok ang mga pampasaherong bus upang mapaluwag ang daloy ng trapiko.

Kahapon sa panayam sa radyo, kinumpirma ni Mayor Vergel “Nene” Aguilar na nasa kanilang plano na ito at maaaring magpalabas sila ng kahalintulad na ordinansa tulad ng sa Maynila. Maaari rin umanong magtayo sila ng “common bus terminal” sa mga hangganan ng lungsod upang doon na lamang magbaba at magsakay ng mga pasahero.

Partikular na tinukoy ni Aguilar ang matinding pagbubuhol ng trapiko na nararanasan ngayon sa Alabang-Zapote Road dahil sa dami ng pampasaherong bus na pumapasok sa lungsod. Bukod pa rito ang mga bus na walang prangkisa at out-of-line.

Sa pamamagitan ng pagre-regulate sa mga pampasaherong bus, malalabanan ng husto ang mga kolorum na bus na pangunahing mga kaskasero at dahilan ng aksidente sa lansangan.

Nakiisa rin si Aguilar sa panawagan sa Land Transportation Franchising and Regulatory Board (LTFRB) na pagkonsulta muna sa mga lokal na pamahalaan bago mag-apruba ng mga bagong prangkisa ng bus dahil sa sobrang dami na ng bus na bumibiyahe sa Metro Manila.