Atimonan report bigo sa deadline

MANILA, Philippines - Nilinaw kahapon ni Justice Secretary Leila de Lima na inabisuhan niya si Pangulong Aquino na hindi kayang habulin ng National Bureau of Investigation (NBI) ang unang itinakdang deadline sa pagsusumite ng isinagawang imbestigasyon sa Atimonan incident dahil sa marami pang nagaga­nap na pag­ babago katulad ng pagsulpot ng mga testigo ng dalawang pa­nig.

Ang pagsulpot ng ma­rami pang development ang pinag-aaralan pa nga­yon ng NBI para isama sa isusumiteng ulat kaya hindi naihabol sa Pangulo bago ito tumulak kahapon sa Davos, Switzerland sa dadaluhang forum ng world leaders.

Ang Pangulo ay lumi­pad bandang alas-11:00 ng umaga kahapon ka­sama ang buong delegasyon para sa economic forum.

Samantala, nadagdagan ang ikatlong testigo sa panig ng DOJ at hawak na ng NBI.

Kinumpirma din ni de Lima na ang ikatlong testigo, na una nang nag­tago dahil sa takot ay kusa nang lumapit sa NBI at ang salaysay umano nito ay tugma o nagco-corroborate sa mga testimonya ng naunang dalawang testigo.

Agad isinailalim sa Witness Protection Pro­gram (WPP) ang bagong testigo dahil naniniwala sila na may maitutulong ito sa ginagawang imbes­ti­gasyon ng ahensiya.