Food security tiniyak

MANILA, Philippines - Walang magiging problema sa supply ng pagkain sa buong hilaga at gitnang Luzon dahil sa inaasahang masaganang ani sa lalawigan ng Isabela ngayong 2013.

Ito ang tiniyak ni Gov. Bojie Dy ng Isabela dahil sobra-sobra raw ang aanihing pananim ng kanilang lalawigan na hindi lang makakasapat kundi malaking tulong pa sa ibang probinsiya sa kanilang rehiyon.

“Masisipag ang aming mga magsasaka kaya naman pinagpapala ang aming probinsiya ng masaganang ani,” ayon kay Governor Dy.

Pero tinukoy ng go­ber­nador na dahil sa maganda nilang prog­rama sa agrikultura kaya inaasahan ang magandang ani sa kabila ng mga nagdaang kalamidad at iba pang problema sa mga pananim.

Binanggit ni Governor Dy ang inilunsad nilang BRO o Bojie-Rodito Opportunities na kung saan naglaan sila ng 9 point benefit pac­kage para sa maliliit na magsasaka.

Ayon naman kay Vice Gov. Rodito Albano, ang Isabela ay nagawaran ng Gawad Saka Award ng Department of Agriculture, topnotcher din sa produksyon ng palay at mais at may masiglang animal industry at maipagmamalaking fisheries sector.