MANILA, Philippines - Itinuturing na umano ni Marbel Bishop Dinualdo Gutierrez na kabilang na ngayon sa political dynasty ang angkan ni Sarangani Rep Manny Pacquiao kasunod nang paghahain ng certificate of candidacy ng maybahay nito na si Jinkee bilang bise gobernador sa Sarangani sa susunod na eleksiyon.
Sina Cong.Pacquiao at misis na si Jinkee ay kapwa nakapagsumite na ng COCs sa Comelec provincial office.
Sinabi ni Bishop Gutierrez na dagdag na ngayon sa listahan ng mga kilalang angkan ng pulitika sa Sarangani ang mga Pacquiao tulad ng pamilya Chiongbian, Antonino at Constantino.
Nang tanungin kung epektibong lider si Rep. Pacquiao, gumanti lang din ng tanong na sagot ang obispo kung ilan na ang naiakdang panukalang batas ng kongresista.
Gayunman, hinangaan ng obispo ang pagiging mapagbigay ng pambansang kamao na aniya’y inaabuso naman ng iba.