Ex-MWSS chief ipinapaaresto

MANILA, Philippines - Ipinapaaresto ng Sandiganbayan first division si dating MWSS administrator Orlando Hondrade kaugnay ng maanomalyang paggamit ng pondo ng ahensiya noong 2004.

Ito ay makaraang magpalabas ng arrest warrant ang Sandiganba­yan laban kay Hondrade kasabay ng pagpapalabas ng korte ng hold departure order para mapigilan ang dating opisyal na makalabas ng bansa.

Ang kaso ay nag-ugat nang madiskubreng ang laang P20 milyong emergency fund ng MWSS ay ginamit ni Hondrade sa pagrenta ng chopper mula sa Asia Aircraft Overseas Philippines Inc. sa ‘di ma­lamang dahilan.

Sinasabing ang naturang pondo ay laan sa pagpapagawa ng emergency bridge at paglilinis ng Umiray-Angat Transbasin Project na nasira ng bagyong Winnie at Yoyong noong December 2004.