Publiko puwede sa Palasyo

MANILA, Philippines - Bubuksan sa publiko ang burol ngayon ni DILG Secretary Jesse Robredo sa Palasyo ng Malacañang.

Sinabi ni Communi­cations Group Usec. Ma­nolo Quezon, minabuti ng binuong komite na na­ ngangasiwa sa funeral arrangements ni Sec. Robredo na iburol sa Kalayaan Hall ang yumaong kalihim dahil na rin sa malaki ang lugar.

Ito ang kauna-una­hang pagkakataon na may ibuburol na yumaong miyembro ng Gabinete sa Kalayaan Hall.

Wika ni Usec. Quezon, sasalubungin ni Pa­ngulong Aquino ang bangkay ni Robredo sa Ma­lacañang ngayong alas-11 ng umaga kung saan ay bibigyan siya ng arrival honors ng Presidential Security Group (PSG) at bibigyan din ito ng 19-gun salute.

Itinakda naman ang public viewing sa labi alas-7 hanggang alas-11 ng gabi matapos ang memorial service ng DILG at attached agencies nito.

Mula alas-8 ng umaga hanggang alas-5 ng hapon sa Sabado ay bukas naman sa publiko ang pagsilip sa labi ng kalihim sa Kalayaan Hall kung saan ang publiko ay padadaanin sa Gate 7 ng Malacañang.

Ibabalik naman ang labi ni Sec. Robredo sa Naga City Hall sa Linggo ng umaga at ililibing ito sa Martes matapos ang ‘state funeral’ nito.