Sabwatan sinisilip sa 'hot rice' sa Subic

MANILA, Philippines - Nagkaroon umano ng sabwatan kaya naipasok sa Subic Port ang nasa 420,000 bags ng bigas kahit walang import permit.

Sa Senate hearing kahapon, sinabi ni Sen. Ralph Rec­tor, chairman ng Senate Committee on Ways and Means, na lumilitaw na nagkutsabahan ang mga opisyal ng Subic Bay Metropolitan Administration, ang Indian company na Amira C Food Corp. na sinasabing pinakamalaking kompanya ng bigas sa India, ang locator ng SBMA na Metro Eastern Trading Corp. at isang Stef Sanyo ng SBMA.

Ayon kay Recto, malinaw umano na matapos tanggihan ang nabanggit na libo-libong sako ng bigas sa Indonesia dahil sa kawalan ng import permit, naghanap ito ng buyer sa Pilipinas at merong nakipagsabwatan sa SBMA kaya naipasok ito sa Subic.

Sa pagdinig, inamin ni Cesar Bulaon, kinatawan ng Metro Eastern Trading Corp., ang consignee ng 420,000 sako ng bigas na nanggaling sa Indian company na Amira C Foods International ang transshipment na dadalhin sana sa Indonesia pero hindi ito tinanggap sa nasabing bansa kaya idineretso sa Pilipinas para sa warehousing.

Inamin din ni Bulaon na wala silang importation permit para ipasok ang cargo sa Pilipinas.

Ayon pa kay Bulaon, nilapitan sila ni SBMA senior deputy administrator for business Stef Saño kaugnay sa nasabing shipment ng Indian rice.

Sinabi naman ni NFA Administration Angelito Banayo na hindi siya nagbigay ng importation permit sa Metro Eastern.

Iginiit naman ni Senate President Juan Ponce Enrile na dapat masibak sa puwesto ang mga opisyal na mapapatunayang nakipagsabwatan para maipasok sa Subic ang imported na bigas.

Sabi pa ni Enrile, hindi dapat i-release ang imported na bigas dahil hindi pa tapos ang imbestigasyon tungkol dito.

Kung mapapatunayan aniyang smuggled ang mga bigas dapat itong kumpiskahin at ipamahagi sa mga mahihirap upang hindi na mapakinabangan ng mga smugglers.