Kapitolyo ng Bulacan may P20-M utang sa Meralco? Ni Butch Quejada

MANILA, Philippines - Posibleng madiskaril ang serbisyo sa apat na mahahalagang opisina sa kapitolyo ng Malolos, Bulacan dahil umano sa pagkakautang nito ng P20 milyon sa kuryente para sa mga buwan ng Pebrero hanggang Mayo ng taong kasalukuyan.

Ang mga opisina na lubhang maaapektuhan ay ang mga sangay ng Red Cross, Commission on Audit, Civil Service Commission at ang provincial jail.

Pinadalhan na ng disconnection notice ng Meralco ang kapitolyo pero ng magfollow-up si Gng. Lorenza Reyes ng Malolos office ng Meralco ay para sa buwan lamang umano ng Pebrero ang ibabayad ng kapitolyo.

Ikinagulat naman ng mga residente kung bakit umabot na sa P20 milyon ang utang ng kapitolyo sa Meralco ga­yong tuluy-tuloy naman daw ang koleksiyon ng buwis.

May kaukulang budget umano ang kapitolyo para sa kuryente na umaabot sa P70 milyon taon-taon.