Singil sa kuryente bababa

MANILA, Philippines - Bababa ng P0.24 kada kilowatt hour (kWh) ang generation charge ng Manila Electric Company (Meralco) ngayong Marso.

Bunsod nito, mula sa dating P5.57 per kWh na singil noong Pebrero ay magiging P5.33 na lamang ito ngayong buwan.

Ayon kay Joe Zaldariaga, spokesman ng Meralco, ang pagbaba ay bunsod nang pagbabawas ng Wholesale Electricity Spot Market (WESM) charges, na nagko-contribute ng limang porsiyento ng power requirements ng Meralco.

Ang WESM charges ay bumaba ng P5.04 kumpara noong nakaraang buwan.

Idinagdag pa ng Meralco na ang improved availability sa mga generating companies, partikular ang mga coal-fired power plant, ang dahilan nang pagbaba ng rate sa spot market.