Demolisyon sa North Triangle tuloy

MANILA, Philippines - Tuloy ang demolisyon ng National Housing Authoriry (NHA) sa 300 informal settlers sa NorthTriangle, Quezon City.

Ayon kay Atty. Chito Cruz, general manager ng NHA, ito ay matapos ang pitong araw na palugit na ibinigay ng ahensiya sa naturang mga residente para gibain ang kanilang bahay na muli nilang tinayo doon.

Binigyan linaw ni Cruz na ang 300 pamilyang ito ay tumanggap na ng pabahay ng NHA o nakakuha na ng financial assistance mula sa ahensya.

Anya, matapos makakuha ng pabahay at financial assistance ay muling nagtayo ang mga ito ng bahay sa lugar.

Ayon naman kay Cruz, hindi dapat mag-alala ang mga pamilyang hindi pa nakakakuha ng ayuda o pabahay dahil hindi sila kasama sa demolisyon sa susunod na linggo. Nakikipag-ugnayan na ang NHA sa QC police para sa gagawing demolisyon.