OFW piniling makatulong kahit nakansela ang pagsakay sa eroplano

MANILA, Philippines - Mas pinili ng isang 29-anyos na OFW na makansela ang biyahe patungong Singapore upang saklolohan ang taxi driver na maghahatid sana sa kaniya sa airport matapos atakihin sa puso ang huli sa kahabaan ng Roxas Boulevard, Maynila kahapon ng madaling araw.

Naging saksi sa pagkamatay ng biktimang si Amor Mario, 57, driver, ng Extremadura st. Sampaloc, Maynila ang OFW na si Violeta dela Cruz, may asawa, ng Sampaloc.

Sa ulat ni SPO1 Jupiter Tajonera ng Manila Police District-Homicide Section, dakong alas-3:30 ng madaling araw ay nakaramdam ng paninikip ng dibdib ang driver at inihinto sa tapat ng Manila Yacht Club ang sasakyan.

Sa halip na iwan ang driver dahil alas-5:20 ang flight ni dela Cruz at kumuha ng ibang sasakyan, binuksan nito ang lahat ng bintana ng sinasakyang Nissan Sentra (TBC-800) at humingi ng saklolo sa dumaraang motorista kaya nadala sa Ospital ng Maynila si Mario.

Dakong alas-8:20 ng umaga nang tuluyang bumigay ang biktima kaya tinulungan na rin ni dela Cruz na mailagak ang labi nito sa St. Ivan Funeral Homes.