Arroyo gov't nagpabaya kaya nakabangon ang MILF - Jinggoy

MANILA, Philippines - Mistulang sinisi ni Senate President Pro Tempore Jose “Jinggoy” Estrada ang nakaraang administrasyon dahil itinigil ang all-out war laban sa Moro Islamic Liberation Front  na napabagsak na noong panahon ni dating Pangulong Joseph Estrada.

Ayon sa senador, hindi ipinagpatuloy ng administrasyon ni dating pangulo at ngayon ay Rep. Gloria Macapagal-Arroyo ang pagpulbos sa MILF na sinimulan ng kaniyang ama noong siya pa ang nasa puwesto.

Sinabi ni Estrada na hindi na sana ngayon pinopro­blema ng gobyerno ang MILF kung nagtuloy-tuloy lamang ang pagsugpo sa kanila.

Iginiit pa ng senador na sobra na ang karahasang inihahasik ng MILF at dapat na muling maglunsad ng all-out war laban sa mga ito.

Tinawag pa ni Estrada na mga traydor ang MILF kung saan habang nirerespeto ng gobyerno ang ceasefire agreement ay nagpapalakas naman ang mga ito ng puwersa.

Hindi aniya masisisi ang Philippine Army kung nagpahayag man sila ng pagka-demoralisa makaraang malagasan ng 19 na sundalo.

Matatandaaan na ilang taon na ang nakakaraan ay sinisi rin ni dating Pangulong Estrada ang gobyerno dahil sa ginawang pagbabalik sa MILF ng 23 kuta nito na nasakop sa ginawang all-out war noong 2000 kabilang na ang Camp Abubakar.