MANILA, Philippines - Dinala kahapon sa Philippine Heart Center si Zaldy Ampatuan, isa sa pangunahing suspek sa Maguindanao massacre, kung saan naka-confine ito ngayon sa intensive care unit (ICU) ng ospital matapos umanong makitaan ng butas sa puso.
Alas-12:30 ng tanghali kahapon nang samahan ng mga pulis-QC at PNP mula Camp Bagong Diwa Taguig si Ampatuan makaraang payagan ni Quezon City Judge Jocelyn Solis-Reyes ng Regional Trial Court Branch 221 ang kahilingan ni Zaldy na makapagpatingin sa PHC dahil sa kanyang diabetes at coronary diseases.
Gayunman, dahil sa hinalang may butas ang ugat ng kanyang puso kaya bandang 3:30 ng hapon ay dinala ito sa ICU para isailalim sa angiogram..
Sa isang panayam, sinabi ni Dr. Manuel Chua Chiaco, director ng PHC, bagamat may utos ang QC court na isailalim lamang sa check-up si Zaldy, ang pamamalagi nito ay dedepende umano sa rekomendasyon ng tumitingin sa kanyang cardiologist na si Dr. Danny Quizon.
“Pag dinala dito ang pasyente na sasailalim sa angiogram, hindi yan hanggang mamaya o hanggang bukas yan, malamang abutin yan dito ng hanggang Biyernes depende sa resulta ng kanyang angiogram,” pahayag ni Chua Chiaco.
Sinabi pa nito na kapag natiyak na talagang may butas ang ugat sa puso ni Zaldy ay dadaan ito sa angioplasty kaya maaari itong ma-confine.
Si Zaldy ay unang tinanggihan ng St. Lukes Hospital sa Global City, Taguig para magpa-check up dahil sa usaping seguridad.