Hirit ni Rolito Go 'wag payagan

MANILA, Philippines - Hinikayat kahapon ang Department of Justice (DOJ) na magtalaga ng isang grupo ng mga doktor sa New Bilibid Prison (NBP) sa Muntinlupa City para gamutin ang mga “living out pri­soners” na tulad ni convicted mur­derer Rolito Go na umamin na araw-araw siyang lumalabas ng kulungan noong nakaraang taon para sa kanyang hospital check-up.

Umapela si Mrs. Rosario Maguan, ina ng road rage victim na si Eldon, kay DOJ Secretary Leila de Lima na ibasura ang aplikasyon ni Go na makalabas ng bilibid ngayong Lunes para sa kanyang medical treatment dahil ginagamit na umano itong alibi para mabisita ang kanyang pamilya sa Quezon City umpisa pa noong taong 2008.

Nadiskubre ni Mrs. Maguan ang “indefinite passes” na inisyu ng DOJ noong nakaraang taon kay Go para makalabas ng NBP compound ay expired na.

Nabatid din ni Mrs. Maguan na ang medical abstract findings ng Las Piñas General Hospital, na inisyu noong December ng nakaraang taon ay hindi nagsasaad na may serious at life threatening na sakit si Go.

“Ang alam namin ay nagpapamasahe lang si Mr. Go sa Makati tuwing umaalis ng Bilibid at hindi nagpagamot,” ayon kay Mrs. Maguan. 

Taliwas ito sa pahayag ni Go na mayroon siyang colon cancer at kailangang halos araw-araw lumabas ng bilibid para sa kanyang radiation at chemotherapy sessions.