Rama gireklamo ngadto sa ombudsman tungod sa demolisyon

CEBU, Philippines -  Misang-at og kasong administratiba ang mga molupyo sa Mahiga Creek inubanan sa Pagtambayayong Foundation batok ni Mayor Michael Rama, hepe sa Squatters Prevention Enforcement Elimination Division (SPEED) nga si Noel Artes ug hepe usab sa Disaster Coordinating Council nga si Alvin Santillan ug Harold Alcotin. Si Hope Minor ang representante sa Pagtambayayong Foundation mibutyag nga ilang gisang-at ang maong kaso tungod sa makaluluoy nga kahimtang sa mga apektadong pamilya sa demolisyon.

Midugang si Minor nga ang gibuhat sa mayor dili makatarunganon tungod kay wala gyud kini mogahin og relocation site. “Dili man gud ni makatarunganon ang gibuhat ni Mayor, mahatagan unta og ensaktong proseso ba, okay raman unta nang manglimpyo sa mga rivers pero asa man diay ang mas importante ang sapa o ang tawo?” pangutana pa niini.

Midugang si Minor nga ang mga molupyo makig-estorya unta sa Mayor kalabot niini apan gikatahong gihagit sila niini nga magkita nalang sa korte hinungdan nga ila ra usab nga gisunod ang gisugyot sa mayor.

Samtang si kanhi city administrator Francisco ‘Bimbo’ Fernandez sa Pagtambayayong nagkanayon nga maong namuyo ang maong mga pamilya sa daplin sa sapa tungod kay wala nay kapaingnan.

Karon giabog na sila sa dakbayan apan walay kabalhinan maong giisip nilang di kini makatarunganon. Karong Lunes mokuha og temporary restraining order sa korte ang mga molupyo aron ipahunong ang demolisyon. (BANAT NEWS)