MANILA, Philippines - Hiniling ni Atty. Oliver Lozano sa Anti-Money Laundering Council (AMLC) na imbestigahan at pigilin ang lahat ng pera sa bangko at mga ari-arian ng magkapatid na Raymond at Roger Dominguez.
Sa kanyang liham sa AMLC, tinukoy ni Lozano na ang pagkakasangkot ng dalawa sa mga kaso ng carnapping at pagpatay ay sapat nang batayan para maimbestigahan ang dalawa sa posibleng paglabag sa Anti-Money Laundering Law.
Naghihinala rin si Lozano na ang kinita ng dalawa mula sa iligal nilang gawain ay naibahagi nila sa kanilang mga pamilya o kaya ay ginamit sa pagnenegosyo para palabasing kumita sila sa legal na pamamaraan.
Dahil dito kayat hiniling din ni Lozano na maimbestigahan ang mga kaanak ng magkapatid na Dominguez gayundin ang kasintahan ni Raymond na si Katrina Paula.
Una nang ipinagharap ni Lozano ng reklamong carnapping with murder ang mag-utol sa Department of Justice (DOJ) dahil sa nangyaring pagpaslang sa kanyang anak na si Emerson.