DOJ hearing sa hostage crisis kasado na

MANILA, Philippines - Inilabas na ng Department of Justice-Incident Investigation Review Committee (DOJ-IIRC) ang listahan ng mga opisyal ng gob­ yerno at ilang perso­nalidad na iimbestigahan bukas kaugnay sa naga­nap na madugong hostage-taking noong Agosto 23.

Sinabi ni Justice Secretary Leila de Lima, ka­bilang sa isasalang sina DILG Undersecretary Rico Puno, PNP Chief Jesus Versoza, NCRPO Chief Leocadio San­tiago, dating Manila Police District chief Rodolfo Mag­tibay, Manila Mayor Alfredo Lim at Vice Mayor Isko Moreno.

Gayundin ang bus driver ng Hong Thai bus, ilang media personalities at ang babaeng sinasa­bing naghatid kay Sr. Insp. Rolando Mendoza sa Intramuros ilang oras bago maganap ang hostage-taking, mga negotiators kabilang dito si Supt. Orlando Yebra at iba pang police officers.

Giit din ng Kalihim, aapela siya sa mga na­banggit na dumating sa araw ng imbestigasyon at makipag-cooperate para lamang sa clari­ficatory questioning upang mag­bigay linaw kung ano ang tunay na pangyayari at kung bakit nauwi sa ma­dugo ang hostage-taking.

Nakipagpulong na rin kahapon si de Lima sa Committee secretariat kabilang din ang Napol­com secretariat upang hindi magkaroon ng “duplication of questions” at ang pagtatanong ng mga hindi na dapat itanong dahil ang gagawin la­mang nila ay clarificatory questioning ng hindi na rin masayang ang kani­lang oras at panahon.

Umapela na rin si de Lima sa mga local officials na iwasan muna ang pag­sasalita sa pub­liko kaug­nay sa nasa­bing kaso subalit nilinaw niya na hindi ito gag order­.