Pinoy todas sa nasunog na bus sa Italy

MANILA, Philippines - Isang Pinoy ang iniulat na nasawi dahil sa suffocation habang 19 pa ang isinugod sa pagamutan nang masunog ang sinasakyan nilang tourist bus sa Italy noong Hulyo 18.

Ayon sa Department  of Foreign Affairs (DFA), batay sa natanggap nilang ulat mula sa Philippine Consulate-General sa Milan, nakilala ang nasawi na si Procopio de la Cruz, na naninirahan sa Milan.

Dinala naman umano sa Genova ang Pinay na si Billy Jane Sabio upang malapatan ng lunas matapos na masugatan dahil sa aksidente, at nasa maayos na umano ang lagay nito sa ngayon.

Bukod kay Sabio, isinugod din sa pagamutan sa mga bayan ng Savona, Voltri at Pietra Ligure, ang 18 iba pang pasahero matapos na makalanghap ng usok mula sa sunog.

“Milan resident Procopio de la Cruz died of suffocation when a tourist bus containing 63 other Filipinos caught fire. Initial investigations suggested that it was due to an electric short circuit,” ayon sa DFA.

Kaagad namang inatasan ng DFA- Office of the Undersecretary for Migrant Workers Affairs ang Consulate General sa naturang bansa na pagkalooban ng kaukulang tulong ang mga biktima at makipag-ugnayan para sa posibleng pagpapauwi sa Pilipinas ng bangkay ni dela Cruz.