MANILA, Philippines - Itinalaga kahapon ni Pangulong Benigno Aquino III bilang bagong Housing Czar si Vice President Jejomar Binay habang itinalaga na mang chairman ng Government Service Insurance System (GSIS) si dating Negros Occidental Gov. Daniel Lacson habang itinalaga bilang chief negotiator sa MILF peace talks si UP Law Dean Marvic Leonen.
Sinabi ni Pangulong Aquino sa chance interview sa pagdalaw nito sa burol ng 3 sundalo na nasawi sa NPA ambush sa Mountain Province, pinag-aaralan pa niya ang puwedeng pumalit sa posisyon ni GSIS president at general manager Winston Garcia.
Inatasan ni Aquino si Lacson na tutukan ang mga problema ng GSIS partikular ang mga reklamo ng mga miyembro nito kaugnay sa pamamalakad at financial status nito.
Sinabi ni Presidential Peace Adviser Teresita Deles, ang magiging miyembro ng GRP panel ay ihahayag ni Pangulong Aquino sa susunod na mga araw.
Wika pa ni Sec. Deles, bubuo din sila ng bagong advisory council na ang komposisyon ay mga constitutional experts, dating mahistrado at dating chief negotiators para makabuo ng bagong stratehiya at magrerebyu ng mga dating rekomendasyon para sa ikakatagumpay ng peace talks.
Idinagdag pa ni Deles na inaasahan nilang magiging cooperative din ang MILF panel sa panunumbalik ng peace talks.
Ikinatuwa naman ni P-Noy ang pagtanggap ni Binay bilang HUDCC chief.