5 huli sa entrapment ng NBI

MANILA, Philippines - Hawak na ngayon ng National Bureau of Investigation (NBI) ang lima katao maka­raang maaresto sa isang entrapment operation, kaugnay sa diumano’y pag­bebenta ng posisyon bilang kinatawan sa nagwaging partylist group sa kongreso.

Kinilala ni Head Agent Roland Argabioso, ng Field Operations Division (FOD) ang mga suspek na sina Joel Cor­reras Pelo; Mary Anne Fujiwera, isang Ja­panese national na diuma­no’y may na­ka­binbing ka­song swindling; Maria Eli­zabeth Pabalan; Fuden­ciano Mali­nao; at Wen­ceslao Malinao.

Sa isang sketchy report, nag-ugat ang pag-aresto sa mga suspek nang ikanta ng complainant ang gina­wa­gang pagbebenta ng mil­yong hala­ga ng puwesto sa kongreso bilang partylist representative.

Kabilang sa target na ibi­nebentang pwesto uma­no ng grupo ang Buhay partylist kung saan coordinator uma­no ang isang Cheryly Bar­celona.

Nabatid na nagpapa­kila­lang konektado sa Commission on Elections (Comelec) ang mga suspek at isa dito ang nagpapakilalang sa Office of the President.

Nabatid na ibenebenta ang posisyon ng P15-milyon hanggang P10-milyon at nang kagatin ng di pa tinu­koy na complainant ay pu­mayag ang mga suspek sa inisyal na P1-milyong piso.

Nang makipagkita ang mga suspek sa isang hotel sa Malate, Maynila ay di­nakip sila habang hawak ang P1-M boodle money , na inihanda ng NBI sa nasabing entrapment operation.

Patuloy pa ang imbesti­gas­yon sa limang suspek at sa posibleng mga ka­song ka­kaharapin nila.