'Mga corrupt sa GSIS wawalisin' - Erap

MANILA, Philippines - Tiniyak ni dating Pang. Joseph Estrada na bibig­yan niya ng prayoridad ang pagresolba sa problema ng mga public school teachers at ng mahigit sa 1.4 milyong kawani ng gobyerno sa serbisyo ng Government Service Insurance System (GSIS) sa sandaling makabalik siya sa Malacañang.

“Makatitiyak ang ma­sang Pilipino na bilang na ang araw ng lahat ng tiwali sa gobyerno kabilang na ang mga nagkakanlong ngayon sa GSIS,” ayon kay San Juan City Mayor JV Ejercito.

“Ang tunay na reporma sa burukrasya ang isa sa mga prayoridad ni Pang. Erap sa unang 100 araw ng kanyang panunung­kulan,” dagdag pa ni JV.

Ginawa ni JV ang pag­titiyak sa posisyon ni Erap sa reporma sa buru­krasya matapos ang kilos-pro­testa kahapon ng ma­higit 500 public school teachers sa harap ng GSIS building sa Pasay City sa pangu­nguna ni ABAKADA-GURO party list Rep. Jo­nathan dela Cruz, Teachers Dignity Coalition (TDC), Ma­nila Public School Teachers Association (MPSTA) at iba pang samahan ng mga kawani ng gobyerno.

Ang protest caravan ay nilahukan ng mga titser mula sa mga public schools sa Metro Manila, Southern Tagalog, Central Luzon, Bicol at Ilocos region.

Ayon pa kay JV na tumatakbo ring kandidato sa Kongreso, labis na nalulungkot si Erap sa mga balita hinggil sa mga hindi natatanggap na benepisyo ng mga GSIS members at sa hirap na dinaranas nila sa administrasyon ni Gene­ral Manager Winston Garcia.

Inaasahan na umano ni Erap na ‘bangkarote’ ang gobyernong iiwan ng re­himeng Arroyo dahil sa malawakang katiwalian sa gobyerno “at ang matinong pamamalakad ng GSIS ang pinakamabilis na so­lusyon upang agarang ma­bigyang benepisyo ang mga empleyado ng gobyerno.”