MANILA, Philippines - Tiniyak kahapon ni Pangulong Gloria Macapagal-Arroyo na isasalin niya nang maayos ang gobyerno sa susunod na presidente ng bansa sa pagtatapos ng kanyang termino sa June 30.
Sa kanyang pagdalo sa ika-113 anibersaryo ng Philippine Army sa Fort Bonifacio, nagpasalamat ang Pangulo sa mga sundalo na sa loob ng siyam na taon niyang panunungkulan sa gitna ng krisis at kabutihan ay sinuportahan siya.
Siniguro din ni PGMA na kagustuhan niyang makamit ang payapa, maayos at malinis na eleksyon.
Samantala, tiniyak kahapon ni First Gentleman Mike Arroyo na tutulong ang Unang Pamilya sa pangangampanya ng Pangulo sa pagtakbo nito bilang kongresista.
Sinabi ng Unang Ginoo na baka sila na lamang ang mangampanya para kay Pangulong Arroyo sa Pampanga dahil itutuon nito ang kanyang panahon sa ‘governance’. (Rudy Andal)