PGMA, ok mag-appoint

MANILA, Philippines - Maaring humirang ng bagong Chief Justice si Pangulong Gloria Maca­pagal Arroyo mula sa hanay ng mga nakaupong miem­bro ng Korte Su­prema ba­gamat maga­gawa lamang niya ito pag­katapos na mag­karoon ng bakanteng pu­westo sa naturang huku­man, ayon kay Senate Pre­si­dent Juan Ponce Enrile.

Ginawa ni Enrile ang pahayag upang direktang sagutin ang mga patut­sada ng mga kritiko ng pamahalaang Arroyo na nagsabing ipinagbabawal ng Konstitusyon ang pag­hirang ng papalit kay Chief Justice Puno na nakatak­dang magretiro sa May 17 sa edad na 70 anyos.

Sa panayam sa DZRH radio, sinabi din ni Enrile na bagama’t walang binanggit ang Saligang Batas kung paano hihirangin ang Chief Justice, tungkulin ng Pa­ngulo na tiyaking kumikilos nang maayos ang hudika­tura sa lahat ng oras.

Binigyang diin ni Enrile na ang prohibisyon sa Pangulo na gumawa ng appointments sa loob ng 60 araw bago ang susunod na halalan at hanggang sa pagtatapos ng termino ng Pangulo sang-ayon sa Section 15, Article VII ng Constitution ay para la­mang sa executive department ng gobierno.

“Kung magkaroon ng bakanteng puwesto sa Korte Supreme, maaaring punuan ito ng Pangulo sa araw ding iyon mula sa natitirang 14 na Associate Justices,” sinabi pa ni Enrile.

Ipinaliwanag din niya na ang selection process na dapat umpisahan ng Judicial and Bar Council (JBC) ay para lamang sa mga bagong miembro ng Mataas na Hukuman. Ka­ugnay nito, ang pagpili sa susunod na Chief Justice ay hindi na kailangan pang dumaan sa JBC dahil lahat ng na­kaupong mi­embro ng Korte ay may­roon nang stamp of approval ng JBC. (Butch Quejada)