3 'Kings' sumuporta kay Villar

MANILA, Philippines - Tatlong itinuturing na hari sa kani-kanilang la­ra­ngan ang nagpa­hayag ng suporta sa kan­di­datura ni Naciona­lista Party standard bea­rer Sen. Manny Villar sa ginanap na proclamation rally ng NP sa Tondo, Ma­nila kamakalawa ng gabi.

Kabilang sa nag-en­dorso kay Villar na nag­hain na rin kahapon ng kanyang certificate of candidacy sa Commission on Elections ang King of Comedy na si Dolphy, King of Noontime Show na si Willie Re­villame at King of Billiards na si Efren “Bata” Reyes.       

“Tulad ni Manny Villar, ako po ay laking-Tondo. Diyan sa kanto ng Mo­riones at Sta. Maria, diyan ako naglalaro, diyan ako lumaki,” ayon kay Dolphy. Ipinaliwanag ni Dolphy na dapat iboto ng mahihirap at ng lahat ng mamamayan si Villar dahil huwaran ang sena­dor sa pagsusumikap na umunlad sa sarili upang marating ang kanyang mga naging pangarap noon habang lumalaki sa Tondo.

Kasunod nito, sinu­portahan din ni Revil­lame ang kandidatura ni Villar sa pagsasabing “kahit magalit ang sinu­man bukas nakasuot ako ng orange” sa kan­yang noontime show na Wowowee.

Kaugnay nito, sinabi naman ni Reyes na na­ra­rapat lamang na su­por­tahan at iboto si Villar dahil natatangi siya sa lahat ng pulitiko na tu­mu­tulong at sumu­su­porta sa bagitong bilya­rista.

“Alam ninyo, kahit kinakabahan ako, pinilit kong magsalita sa in­yong harapan upang suportahan si Sen. Manny Villar dahil alam kong malaki ang maitu­tu­long niya sa sports partikular sa bilyar dahil natatangi siyang pulitiko na tumutulong sa maliliit at bagitong bilyarista,” sabi pa ni Reyes.