MV Princess of the South wala raw security certificate, Marina kinastigo!

MANILA, Philippines - Muling kinastigo kahapon ng United Filipino Seafarers ang Maritime Industry Authority dahil sa pagpapahintulot umano nito sa MV Princess of the South ng Sulpicio Lines na muling makapaglayag sa karagatan nang walang kaukulang security certificate.

Sa kanyang liham sa board ng Marina, ipinali­wanag ni UFS President Nelson Ramirez na hindi lang kapakanan at kaligtasan ng mga barko ang kanyang inaalala kundi pati na rin sa mga tripulante nito.

Kaugnay nito, hinahanap ni Ramirez ang isang kopya kung meron man ng National Ship Security Certificate dahil nabalitaan niyang padaskul-daskul na ginawa ang sinasabing pagpapalabas ng dokumento na tulad ng naunang ship safety certificate na ipinalabas nang wala sa tamang panahon ng regional office ng Marina sa Cebu para sa MV Princess of the South.

Sinabi ni Ramirez na hindi pa dapat alisin ng Marina ang suspensiyon na ipinataw nito sa MV Princess of South at sa iba pang barko ng Sulpicio Lines habang hindi pa ito nakakasunod sa mga safety requirements.

Sinimulang ipataw ang suspension mula nang lumubog ang isa pang barkong MV Princess of Stars ng Sulpicio noong Hunyo 21, 2008.

Bukod dito, pinaniniwalaan ni Ramirez na hindi pa nabibigyan ng Sulpicio Lines ng hustisya ang mga biktima ng paglubog ng MV Princess of Stars. (Butch Quejada)