691 katao, edad 108, iisa ang birth date

MANILA, Philippines - Ibinunyag kahapon ni dating Akbayan Rep. Lo­ retta “Etta” Rosales sa Commission on Elections na “madumi” ang listahan ng mga botante sa Taguig City, dahil kabilang pa rin dito ang mga botanteng nasa edad 100 pataas.

Sa isang open letter, sinabi ni Rosales sa Come­lec na 691 katao na may edad 100 pataas at pare-pareho ang birth date ang natuklasan sa voters’ list dito kung saan ito ay kaduda-duda dahil pawang mga residente ang mga ito ng Taguig City.

Ayon kay Rosales, sa nasabing bilang ay 624 ang ipinanganak noong 1901 base sa kanilang birth date, at 621 dito ang may pare-pa­rehong araw ng kapa­nga­nakan na January 1.

Aniya, nakakaduda na mayroong 621 katao na pare-parehong naninira­han sa Taguig at isinilang ng sabay-sabay noong January 1, 1901.

Bilang pangulo ng Ins­titute for Political and Electoral Reform (IPER), ay isinagawa nito ang im­bestigasyon kasabay ang panawagan sa Comelec na agad linisin ang voters’ list dito at patawan ng kauku­lang parusa ang nasa likod ng polluted voters’ list.

Ayon naman kay Co­me­lec Chairman Jose Melo, posibleng simpleng “computer glitch” lang ito at maaaring nabigo lang ang mga rehistradong botante na ilagay ang petsa ng kanilang kapanganakan ng sila ay magparehistro.

Iginiit din ni Rosales na hindi dapat tinatang­gap ng Comelec ang mga nagpa­parehistro kung wala silang inilalagay na date of birth.

Show comments