Kuya Germs binara si Jamby

MANILA, Philippines - Mismong ang kilalang TV host na si German Moreno o Kuya Germs ay asiwa at aburido na rin kay Senador Maria Consuelo “Jamby” Madrigal sa usaping C5 hearings. 

Binatikos ni Moreno si Madrigal dahil mas inuuna pa raw nito ang pagbato ng putik at pamumulitika imbis na pagtuunan ng pansin ang pagtulong sa daang libong mga mamamayang nagdurusa dahil sa bag­yong Ondoy.

Sa programa niya sa DZBB noong Martes, si­nabi ni Moreno na bakit ko­rup­syon at iba pang bahid pulitika ang pinupuntirya ni Madrigal. Dapat anya ay pagtulong sa mga nasa­lanta ng bagyo ang pagka­abalahan nito. 

Ginawa ni Moreno ang pahayag bilang reaksyon sa panibagong pagdinig ng Senado noong Martes sa kontrobersyal na double insertion ng budget ng C5 Road. Dito, pinipilit ng kampo nina Madrigal at Senador Mar Roxas na hanapan ng butas ang mga testigong nag-absu­welto kay Senador Manny Villar sa naturang usapin.

Habang inuupakan si Villar ng kanyang mga kalaban sa pulitika tulad nila Madrigal at Roxas, siya at ang mga kasama niya sa Nacionalista party ay nasa mga evacuation centers at namimigay ng ayuda sa libo-libong bik­tima ng tra­hedya.  

Tulad ng dati, idiniin ng isang pangu­nahing testigo na si dating Bu­reau of Internal Re­ve­nue (BIR) offi­cer Car­me­lita Bacod na tama ang kwenta ng buwis na bina­yaran ng mga kum­panya ni Villar sa mga lupaing suma­saklaw sa C5 project.    

Ang C5 hearings sa kasalukuyan ay umabot na sa 18 pagdinig kasama ang kahapon, Huwebes.

May isang taon na ring nagaganap at milyon mil­yon na ang nagastos ng Senado sa nasabing im­bes­tigasyon subalit hang­gang sa kasalukuyan ay puro paratang hangin lang ang nailalatag ng kampo ni Madrigal.  

Ang imbestigasyon sa C5 ay pinangungunahan ni Senador Panfilo “Ping” Lac­ son, isa ring panguna­hing kritiko at kalaban sa pulitika ni Villar. (Butch Quejada)