MANILA, Philippines - Humingi ng paumanhin ang aktres at TV host na si Kris Aquino kay Senador Panfilo Lacson na bumatikos sa umano’y pakikialam niya sa love life ng kapatid niyang si Senador Benigno Simeon “Noynoy” Aquino III.
Ito ang nabatid kahapon kay Lacson na nagkaayusan na sila ni Kris na nagpadala ng text message sa manugang niyang aktres na si Jodie Santamaria para iparating ang pagpapa umanhin ng TV host.
Nilinaw ni Kris na wala siyang kapasidad na pakialam o kontrolin si Noynoy.
Matatandaan na hindi nagustuhan ni Lacson ang naging apela ni Kris kay Noynoy na kung maaari ay huwag na itong mag-asawa dahil ang nasagasaan sa nasabing panawagan ay ang nobya ni Noynoy na si Valenzuela Councilor Shalani Soledad na dati namang tauhan ni Lacson.
Sinabi ni Lacson na hindi na dapat idinadaan sa telebisyon sakali mang hindi boto si Kris sa kanyang magiging hipag lalo pa’t nasa edad na naman si Noynoy para magdesisyon sa sarili.
Ikinatuwa naman ng senador ang pagtanggap ni Kris ng pagkakamali
“Nag-text si Senator Ping kay Jody, kasi nga may text si Kris at siguro naman nai-forward iyon kay Kris at alam din naman ni Kris na komento lang ng isang ama iyong pagtatanggol niya (Lacson) kay Shalani,” sabi ng impormante. (Malou Escudero)