Hinimok kahapon ng Malacañang si Deputy National Security Adviser Luis “Chavit” Singson na bilang ‘delicadeza’ sa kinakaharap nitong kaso na isinampa laban sa kanya ng dati niyang live-in partner ay magbakasyon muna ito sa kanyang posisyon.
Sinabi ni Deputy Presidential Spokesperson Lorelei Fajardo na hindi naman gustong unahan ng Palasyo ang magiging resulta ng imbestigasyon kay Singson pero bilang ‘delicadeza’ ay dapat magboluntaryong magbakasyon muna ito.
Aniya, inatasan na rin ni Pangulong Gloria Macapagal-Arroyo si National Security Adviser Norberto Gonzales na magsagawa ng imbestigasyon at kausapin si Singson saka ito magsumite ng rekomendasyon.
Idinemanda si Singson ng dati niyang kinakasamang si Rachell Tiongson dahil sa panggugulpi niya rito at sa kalaguyo nito makaraang mahuli niya ang mga ito sa isang bahay.(Rudy Andal)