'Yellow fever'

MANILA, Philippines - Kulay dilaw ang hinihi­nging palatandaan ni Senator Simeon Benigno “Noy­noy” Aquino III para makum­binsing tumakbo sa 2010 election bilang pangulo o bise-presi­dente.

Sinabi ni Aquino na kung magku-kulay dilaw ang buong paligid o ma­rami ang magsusuot ng dilaw na damit, magsasa­bit ng yellow ribbon at yellow ID ay saka siya mag­de­desisyon na tu­makbo sa mas mataas na posisyon.

“Wear something yellow on your person, notes, with your ID, panglagay sa ba­hay, sa sasakyan para ma­pakita na marami tayo ditong umaasa at magcko-commit na babaguhin natin itong ating bayan,” sabi ni Aquino.

Nilinaw pa rin ni Aqui­no na hindi dapat bigyan ng anumang malisya ang pi­naiikot na signature campaign ng grupong “The Heightened Ethics League of the Philippines” ngunit mas makabubuti kung ang pagsusuot pa rin ng dilaw ang gagawin ng publiko da­hil ito ay maitu­turing na “public statement” na hini­hikayat siyang tumakbo sa mas mataas na posisyon dahil ito ang isang “sign” na kanyang hinihingi dahil hindi niya ito itutuloy kung walang maku­kuhang su­porta mula sa mga ma­ma­mayan.

At kung makikita ang tahasang suporta at ka­hilingan ng publiko ay ma­aaring mabago ang desis­yon ng kanyang mga kapa­tid na tumututol sa kanyang kandidatura.

Ngayong linggo ay mag­pupulong sina Aqui­no at Senador Manuel Roxas II, pangulo ng Liberal Party, pero tumanggi si Aquino na banggitin kung anong pag-uusa­pan.

Kinumpirma rin ni Aqui­no na ilalabas niya ang kanyang desisyon pagka­ta­pos ng ika-40 days na kamatayan ng kanyang ina sa Setyem­bre 9.