Roxas sinisi sa mahal na gamot

MANILA, Philippines - Sinabi kahapon ni Iloilo Congressman Fer­jenel Biron na si Senador Manuel Roxas II ang dapat sisihin sa mataas na presyo ng mga gamot sa bansa dahil ang huli ang nagpabasura sa automatic price regulation ng Universally Accessible, Cheaper and Quality Medicine Act o Republic Act 9502.

Sinabi ni Brion na da­pat sisihin ni Roxas ang sarili nito sa pagkabigo ng naturang batas at hindi si Pangulong Gloria Arroyo dahil ipinatanggal ng na­turang senador ang pro­bisyon sa automatic price regulation na magtitiyak sa murang halaga ng gamot.

Nabatid na ipinanu­kala ng mga kongresista ang nasabing probisyon pero ipinatanggal umano ito ng mga senador na kinabibi­langan ni Roxas na naggiit na ibigay na lang ito sa kapangyarihan ng Pangulo sa pama­magitan ng re­komendas­yon ng Department of Health.

Sinabi naman ni Manila Rep. Bienvenido Abante na pamumulitika lang ang akusasyon ni Roxas na nakikipagsab­watan ang Pangulo sa mga kumpanya ng ga­mot. Idiniin ni Abante na kasama siya nang maki­pagpulong ang Pangulo sa mga kinatawan ng mga naturang kumpanya para bigyan ang mga ito ng 10 araw para ibaba ang presyo ng mga ga­mot. (Butch Quejada)