Cory lumabas na sa ICU
MANILA, Philippines – Bahagyang bumuti ang kalagayan ni dating Pangulong Corazon Aquino bagama’t nasa maselang kalagayan pa rin bunga ng pinagdadaanan nitong sakit na colon cancer.
Batay sa impormasyong nakalap, kahapon ay inilipat na sa regular room ang dating Pangulo mula sa intensive care unit ng Makati Medical Center.
Nabatid na tinigilan na rin ang pagbibigay ng chemotherapy at ibang maselang medical procedure kay Gng. Aquino.
Kinumpirma naman ni Sen. Noynoy Aquino na bahagya na ring nakakapag-salita ang dating Pangulo.
Sa ngayon ay batid na rin ng dating Pangulo na marami ang nagdarasal ngayon para sa tuluyan niyang paggaling bagaman una nang nabanggit nito na gusto na niyang makasama ang kaniyang namayapang esposo na si Ninoy.
Patuloy naman ang pagdaraos ng 9-days novena ng mga tagasuporta, kamag-anak at mga kaibigan ni Cory sa Greenbelt Chapel ng Makati City.
Maging si Pangulong Gloria Macapagal-Arroyo ay nakiisa sa pagdarasal para kay Gng. Aquino. Nanawagan ang una sa taumbayan na manalangin para mabilis na gumaling ang huli. Napaulat na plano ng Malacanang na mag-alay ng misa para sa kanya. (Rose Tamayo-Tesoro at Rudy Andal)
- Latest
- Trending
