MANILA, Philippines – Nananawagan ang pribadong Jeverps Corp. sa mga awtoridad na pigilin ang umano’y maruming taktika ng isa pang pribadong kumpanyang Kolonwel Trading sa mga kakumpetensya nito sa negosyo lalo na sa mga bidding sa mga proyekto ng pamahalaan.
Sinabi ng tagapagsalita ng Jeverps na si Chito Dimaculangan na ugali na ng Kolonwel na siraan ang mga kumpanyang tumatalo rito sa mga bidding.
Ginawa ni Dimaculangan ang pahayag bilang reaksyon sa kasong graft na isinampa ng Kolonwel sa Ombudsman laban sa Jeverps na isinangkot ng una sa noodles scam.
Inihalimbawa ni Dimaculangan na, noong 2007, humingi at nakakuha ng permanent injunction sa Manila Regional Trial Court ang Kolonwel nang matalo ito sa bidding para sa 17.5 milyong kopya ng Makabayan textbook at teachers manual.
Bukod dito, isinagawa pa umano ng Kolonwel ang black propaganda laban sa Vibal Publishing na nanalong bidder.
Pero inalis ng Supreme Court ang injunction at kinastigo ang Kolonwel dahil sa kabiguan nitong sundin ang bidding process.
Noong 2004, sinalihan ng Kolonwel sa pamamagitan ng sister company nitong Joodar Cottage Industry ang bidding para sa combat boots ng mga sundalo ng Armed Forces of the Philippines. Nang matalo ang Kolonwel, nagpakalat umano ito ng paninira laban sa nanalong bidder. Isinantabi ng AFP ang reklamo at ipinagpatuloy ang proyekto. (BQuejada)