EDSA 3 vs Chacha

MANILA, Philippines - Pinangangambahang sisiklab ang pangatlong people power revolution para harangin ang pag­sususog sa Konstitusyon o Charter Change (Cha-Cha) sa pamamagitan ng Constituent Assembly.

Sinabi kahapon ni Se­nador Rodolfo Biazon na hindi malayong may ma­ganap na EDSA 3 dahil nakikita ngayon ang ilang palatandaan noong bago naganap ang EDSA 1 at 2 people power revolution.

Sinabi pa ng senador na dumarami at lumala­kas ang mga sektor na tumu­ tu­tol sa Resolution No. 1109 na pinagtibay nitong linggo ng House of Representatives na nag­lala­yong buuin ito bilang Constituent Assembly nang hindi kasali ang Senado para masusu­gan ang Saling-Batas.

Maliwanag anyang la­bag sa konsepto ng bicameralism at demo­kras­ya ang ginawa ng maba­bang ka­pulungan ng Kon­greso.

Pero dapat aniyang bantayan ang mga susu­nod na kaganapan dahil kung magpapatuloy ang kaguluhan, siguradong igigiit ng mga sundalo ng Armed Forces of the Philippines ang kanilang constitutionally mandated duty na proteksiyunan ang mga mamamayan at estado.

Subalit nakakabahala aniya ang posibleng mang­­yari kung hindi ibabalik ng mga sundalo ang kapang­yarihan sa civilian authority.

Samantala, sinabi ni Manila Auxillary Bishop Broderick Pabillo na la­la­hok din ang simbahang Ka­toliko sa mga kilos-protesta laban sa Cha-Cha.

Ayon kay Pabillo, ma­kikiisa sila sa kilos pro­testa ng grupo ni Jesus Is Lord leader Bro. Eddie Villa­nueva at mga interfaith rally ng iba pang gru­po upang ipakita ang ma­riing pagtutol sa ConAss.

Hindi na rin aniya da­pat na daanin pa ang pag­tutol sa mga dema-de­manda dahil matagal pa aniya ang aabutin nito, lalo na’t pati aniya mga hukom sa bansa ay tila naiimplu­wensiyahan na rin.

Kaugnay nito, uma­lerto na ang National Capital Region Police Office kaug­nay ng ipatutu­pad na security measures sa ban­tang malawakang kilos protesta laban sa ConAss.

Una rito, nagbanta ang United Opposition na mag­sasagawa ng indignation rally upang iprotesta ang ConAss sa darating na Hunyo 10 sa Makati City.

Pero tiniyak ni Defense Secretary Gilberto Teo­ doro Jr. na walang na­mumuong anumang banta ng desta­bi­lisasyon sa hanay AFP.

Ayon kay Teodoro, pro­­pesyunal ang mga sundalo at hindi ang mga ito maki­kisawsaw sa usapin ng pulitika sa bansa.

Sinabi ni Teodoro na solido sa pagsuporta sa lehitimong gobyerno ang AFP at ang usapin ng Cha-Cha ay ipauubaya na lamang ng mga ito sa mga Korte Suprema.