MANILA, Philippines – Kinumpirma kahapon ng tanggapan ni Senator Ramon “Bong” Revilla Jr., na may 40 sex video library si Dr. Hayden Kho kasama ang iba’t ibang klaseng babae.
Ayon kay Revilla, posibleng nahihiya lamang ang iba pang biktima ni Kho na lumantad dahil sa kakaharaping malaking kahihiyan.
Hinikayat ni Revilla ang ibang biktima na lumantad at kasuhan si Kho sa halip na manahimik na lamang.
Bukod sa sex video ni Katrina Halili at Kho, kalat na rin sa internet at pinagpasa-pasahan na rin sa mga cellular phones ang sex video ng doctor kasama ang naging girlfriend na si Maricar Reyes.
Nakatanggap din ng impormasyon ang tanggapan ni Revilla na matagal na naging karelasyon o girlfriend ni Kho si Reyes, isang young star/model ng ABS-CBN kaya posibleng mas marami itong sex video.
Sinabi ni Revilla na dapat sumailalim sa neuro examination si Kho dahil maliwanag na hindi normal ang ginagawa nito.
Itinakda sa Hunyo 1, araw ng Lunes ng Senate committee on women ang imbestigasyon kaugnay sa sex video kung saan inaasahang haharap si Halili.
Samantala, todo-tanggi ang ilang mga senador na napanood nila ang sex video nina Kho at Katrina Halili, maging iba pang kuha sa naging karelasyon ng doktor.
Kabilang sa tumanggi na nakapanood ng video si Senador Francis Pangilinan at Senate pro-tempore Jose “Jinggoy’ Estrada. (Malou Escudero)