MANILA, Philippines – Kulong ng hindi bababa sa tatlong taon ang posibleng maging parusa ni Metro Manila Development Authority (MMDA) chairman Bayani ‘BF” Fernando kung mapapatunayan ang naunang ibinunyag ni Sen. Jose “Jinggoy” Estrada na tumanggap ito ng regalo na nasa P1.1 milyon bilang birthday gift na ang pondo ay kinuha sa Metro Manila Film Festival (MMFF).
Ito ang sinabi kahapon ni Estrada sa panayam sa programang Kartada Escalera sa dzXL.
Ayon kay Estrada, ipinagbabawal sa Presidential Decree No. 46 ang pagtanggap ng regalo sa sinumang empleyado at opisyal ng gobyerno.
Sinabi pa ni Estrada na hindi ordinaryong kaso ang nangyari kay Fernando dahil ipinang-regalo niya sa kanyang sarili ang P1.1 milyong pondo ng MMFF sa tatlong (3) birthday party noong 2003, 2005 at 2006.
“Iyon pa lang ang naki kita natin, 3 birthday, paano pa kaya iyong mga iba pang taon na nag-birthday si Fernando,” ani Estrada.
Naunang ibinunyag ni Estrada ang unti-unti umanong pagkawaldas ng pondo ng MMFF sa kanyang privilege speech sa Senado.
Sinabi pa ni Estrada na anumang araw ay posibleng magpatawag ng public hearing si Senador Richard Gordon, chairman ng blue ribbon committee, tungkol pagkawaldas ng pondo ng MMFF.
Dapat aniyang malinaw na maipaliwag ni Fernando ang nasabing isyu at hindi sapat ang sagot nito sa ilang interview na hindi na niya matandaan ang nasabing regalong natanggap sa kanyang kaarawan. (Malou Escudero)