Patas na paglilitis sa perjury ni Lozada, malabo - COGEO

MANILA, Philippines – Nangangamba ang Con­federation of Government Employees Organizations na hindi makakuha ng patas na paglilitis sa ka­song perjury si Jun Lozada.

Ayon kina COGEO Chair Atty. Jesus Santos at Prof. Arturo de Castro, nga­yon pa lang ay kinakikitaan na ng umano’y pagkiling si Manila Metropolitan Trial Court Judge Jorge Emma­nuel Loredo sa pagdinig sa kaso laban kay Lozada.

Anila, sa ilalim ng rule 5.10 ng Canon 5 ng Code of Judicial Conduct, hindi ma­aaring makitaan ng pa­mu­mulitika ang isang hu­kom.

Kinondena din ng COGEO ang naging kautu­san ni Loredo na ibigay sa Senado ang pangangalaga kay Lozada dahil sa uma­no’y takot na saktan ito ng tauhan ng administrasyong Arroyo.

Malaki ang hinala ng COGEO na maaaring ang personal na interes lang ang iniisip upang magka­roon umano ng promosyon mula sa pagiging hukom at ma­ging mahistrado, kaya ibini­gay si Lozada sa Se­nado.

Pinuna din ng naturang grupo ang pang-iinsulto umano ni Loredo sa private complainant na si Mike Defensor ng tawagin nito na “Railroad man defensor, na walang laruan kundi mga kinakalawang at lumang mga tren.” (Butch Quejada)