Dagdag proteksiyon sa OFW hingi

MANILA, Philippines – Hiniling ni Metro Manila Development Authority Chairman Bayani Fer­nando na dagdagan ang legal requirements sa deployment ng overseas Filipino workers para sa kanilang kaligtasan at proteksiyon.

Iminungkahi rin ni Fernando ang paglikha ng multi-agency task force na tutugon sa mga problema ng mga land-based at sea-based OFW at para ma­laman din ng kanilang pamilya ang tulong na ginagawa para sa kanila.

Inihalimbawa niya ang naging problema ng ma­higit 100 Pilipinong seamen na binihag ng mga pirata sa Somalia. Sinabi niya na walang magkaka­samang ginawa ang ilang ahensiya ng pamahalaan upang matiyak ang kalig­tasan at kalayaan ng mga seaman.

“Oo nga at kumilos nila upang ihanap ng solusyon ang problema ngunit ginawa nila ito nang utay-utay,” ani Fernando. “Kaya nagpupunta na sa media ang kanilang pamilya para humingi ng tulong.”

Sinabi rin ni Fernando na maraming land-based OFWs ang may problema sa kanilang foreign employer at kinalimutan ang importanteng legal requisites tulad ng pagkuha ng working visa at pagpapa­rehistro sa Overseas Worker’s Welfare Administration at pagtatanong sa Philippine Overseas Employment Administration kung ang recruitment agency na kanilang ina­playan ay lisensiyado o hindi.