MANILA, Philippines - Taliwas sa inaasahan, inihayag ng Commission on Elections na 28 bagong partylists lamang ang naiproklama kahapon matapos na maglabas ng desisyon ang Korte Suprema.
Ayon kay Comelec Chairman Jose Melo, hindi umano nila maaaring iproklama ang lahat ng nakalista sa SC bunsod na rin ng mga kasong kinakaharap ng mga ito.
Kabilang na dito aniya ang FPJMP na disqualified habang nakabinbin naman ang disqualification case laban sa Batas partylist.
Sinabi pa ni Melo na sa panig naman ng Yacap at Cocofed, pinag-uusapan pa ang ilang mga kontrobersiyal na isyu kabilang na kung ilang puwesto ang ibibigay sa mga ito.
Matapos ang proklamasyon ng 28 partylists, maaari nang mag-oath ang mga ito sa Lunes kay House Speaker Prospero Nograles. (Doris Franche)