104 Pinoy sa Somalia na-trap!

MANILA, Philippines - Nanganganib ang mahigit 100 tripulanteng Pinoy na kasalukuyang hostage sa Somalia maka­raang maipit sa isinasa­gawang rescue operations ng United States military warships upang sagipin ang isang American ship captain na tinangay ng mga pirata sa Gulf of Aden noong nakalipas na linggo.

Dahil sa nasabing stand­off, umapela ang pa­ma­halaan sa pama­ma­gitan ni Vice President Noli de Castro, tumatayo ring Presidential Adviser on the overseas Filipino workers affairs, na tiyakin ang ka­ligtasan ng mga Pilipi­nong bihag sa Somalia.

Binigyang-diin ni de Castro na bagaman ma­inam ang isinasagawang military action ay marapat na dumaan ito sa konsul­tasyon ng United Nations upang makaani ng mas maraming suporta mula sa iba’t ibang bansa.

Ayon sa report, kumi­kilos na ang mga US warships sa Gulf of Aden upang i-rescue ang US ship captain na si Richard Phillips, 53, ng Underhill, Vermont.

Tanging si Phillips ang nadukot nang umatake ang mga pirata sa sina­sakyang 17,000-ton US-flagged Maersk Alabama vessel kasama ang 20 pang US sailors. Iniligtas ni Phillips ang 20 US crew nang mag-isang sumuko ito sa mga pirata at binig­yan ng instruksyon ang mga kasamahan na mag­tago sa kani-kanilang cabin.

Nabigo ang mga pirata na ma-hijack ang barko dahil mas kokonti ang mga ito kumpara sa mga US seamen pero natangay ng apat na pirata si Phillips sakay ng isang lifeboat. Ang nasabing barko na pag-aari ng Maersk Shipping Line ay may kargang relief foods na ide-deliver ng mga US seamen para sa mga mahihirap sa Somalia, Rwanda at Uganda.

Tinutugis na ng 2 US warships na sinusundan ng US Navy surveillance aircraft ang bangka kung saan sakay ang apat na pirata at ang dinukot na kapitan.

Dahil sa pag-atake ng US forces, napilitan uma­nong mag-alsa ang mga pirata na may hawak na­man sa mahigit daang Pinoy seamen, at iba pang tripulanteng hostages mula sa Russia at Germany.

Nagbigay na rin ng babala ang US Navy sa iba pang barko na umiwas na makalapit sa lugar kung saan isinasagawa ang rescue operations.