Lindol sa Italy, 129 Pinoy nawalan ng bahay

MANILA, Philippines - May 129 Pilipino sa Italy ang nawalan ng ta­hanan nang gumuho ito sa naganap na lindol sa naturang bansa na iki­namatay ng may 179 ka­tao noong Biyernes.

Isa ring Pilipino na si Jefferson Pugal, 31 an­yos, tubong Ilocos Sur, ang kabilang sa mga nasuga­tan sa lindol na may lakas na 6.3 magnitude at higit na nag­pa­yanig sa L’Aquila City sa central Italy.

Ayon sa DFA, si Pugal na nagtatrabaho bilang construction worker sa Italy ay nagtamo ng ma­raming sugat sa iba’t ibang bahagi ng katawan nang mabagsakan ng konkreto ng gumuho nitong bahay. Siya ay kabilang sa naitalang 1,500 katao na naisalba ng Italian rescuers. 

Sa tala ng embahada ng Pilipinas, may 330 Pili­pino ang nakatira sa Central Italy at hindi bababa sa 129 Pinoy naman ang naninirahan sa L’Aquila City kung saan tumama ang 95 kilometrong sentro ng lindol.

Ayon kay Leonor As­cano, may limang taon ng na­ninirahan sa Italy ang kan­­yang pamangking si Jef­ ferson (Pugal) kasama ang asawang si Sophia Ber­mudez at 4-taong gu­lang na anak na si John Paul.

Nanawagan sa pama­halaan ang mga Pilipi­nong nawalan ng tirahan at ngayon ay nasa tent camp sa L’Aquila City na magpadala ng karagda­gang tulong tulad ng pagkain at kasuotan.

Nagpadala na ang mga kinatawan ng em­bahada sa evacuation site sa L’Aquila upang saklolohan ang mga Pilipino na kasalukuyang nasa pangangalaga ng local na awtoridad doon.