MANILA, Philippines - Tila mga pipi na hindi makapag-ingay umano ngayon ang panig ng oposisyon kaugnay sa naglalabasang detalye ng affidavit sa Dacer-Corbito murder case.
Ayon kay Confederation of Government Employees Organizations (COGEO) Chairman Jesus Santos, nakakabingi ang katahimikan ng oposisyon ngayong malaki na ang posibilidad na maibalik sa bansa sina Sr. Supts. Glenn Dumlao at Cezar Mancao.
Anila ang katahimikan ng oposisyon ay malayo sa ginagawa nitong pag-iingay noong si dating Agriculture Undersecretary Jocjoc Bolante ang ibabalik sa bansa.
“Ngayong walang napatunayan laban kay Ginoong Bolante at ang nadidiin sa Dacer-Corbito ay ang boss ng Oposisyon na si dating Pangulo Joseph Estrada at si Sen. Panfilo Lacson, biglang tila naging pipi, bingi at bulag ang mga kritiko ng gobyerno sa pagpapabalik kay Ginoong Mancao. Kung talagang ang Oposisyon ay para sa katotohanan at katarungan, bakit hindi nila agresibong hingin ang pagpapabalik dito kay Ginoong Mancao?” ani Santos.
Hinamon din ni Santos ang oposisyon na di dapat sumali sa anumang gagawing imbestigasyon sa naturang kaso sa oras na dumating ang mga ito sa bansa. (Butch Quejada)