Isinampa kahapon ni dating Senate President Jovito Salonga at ng may 31 civil society leaders sa House of Representatives ang kasong impeachment laban kay Ombudsman Merceditas Gutierrez dahil sa umano’y kawalang-aksyon nito at kapalpakan sa ilang malalaking kaso.
Inindorso ni Akbayan Rep. Rizza Hontiveros Baraquel ang reklamo na pormal na inihain sa tanggapan ng secretary general ng mababang kapulungan na si Marilyn Barua Yap.
Sinasabi sa 33 pahinang reklamong inihain ni Salonga at ng mga pribadong abogado, dating opisyal ng pamahalaan at ng ilan pang personalidad na kasama sa civil society na tinalikuran ni Gutierrez ang tiwala ng publiko at nilabag nito ang 1987 Constitution.
Binanggit sa reklamo ang maling pagtangan ni Gutierrez sa Mega Pacific at corruption case laban kay dating Commission on Elections Chairman Benjamin Abalos, reklamo ng World Bank sa tatlong Filipino cons truction firm na sangkot sa anomalya sa ilang proyekto, P728 milyong fertilizer fund scam, kasong pangingikil laban kay dating Justice Secretary Hernando Perez at sa euro general scandal.
Binatikos naman ni Gutierrez ang impeachment complaint sa pag papahiwatig na isa itong uri ng pamumulitika.
Noong nakaraang linggo lang anya, isinampa ng Ombudsman sa Sandiganbayan ang kasong graft laban kay dating Bukidnon Congressman Nereus Acosta na tumatayo rin bilang bise presidente ng Liberal Party na kinabibilangan din ni Salonga.
“Ako po ay gumaganap sa aking tungkulin at ako po ay napopolitika at latest na na-file-an namin ay si Congressman Acosta,” sabi ni Gutierrez sa isang panayam.
Dumistansiya ang Malacanang sa inihaing impeachment complaint laban kay Gutierrez.
Ayon kay Deputy Presidential Spokesman Anthony Golez, ang paghahain ng impeachment ay bahagi ng demokrasya sa bansa at ipinauubaya na ito ng Palasyo sa Kongreso.