Nagka-buhol-buhol na ang daloy ng trapiko kahapon sa ilang mga pangunahing lansangan sa Kalakhang Maynila dahil sa pagdagsa ng mga pasaherong nagsisiuwian mula sa mga probinsiya matapos ang mahabang bakasyon.
Sa Pasay City, madaling-araw pa lamang ay halos hindi na madaanan ang mga kalye sa palibot ng mga naglalakihang bus terminals ng lungsod.
Pahirapan din sa pagsakay sa taxi kaya hindi maiwasan na magtalo ang mga pasahero at abusadong tsuper na nangongontrata.
Punuan din ang mga parking areas kaya ilan sa mga residente na malapit sa mga bus terminals ang naabala at nagreklamo na rin dahil maging ang kanilang mga driveways ay naharangan ng mga sasakyan.
Ilan naman sa commuters ang nagreklamo sa kakulangan ng mga traffic enforcers na inaasahang mag-aayos at gagabay sana sa mga motorista dahilan upang mas lumala kahapon ang trapiko. (Rose Tamayo-Tesoro)