Abu Sayyaf desperado na

Desperado na ang mga bandidong Abu Sayyaf Group (ASG) dahil ultimong mga batang kalye ay dinudukot na rin ng mga ito, ayon sa opisyal ng militar kahapon.

Sinabi ni Navy Spokesman Lt. Col. Edgard Arevalo, patunay nito ay ang pagdukot ng mga bandido noong linggo sa biktimang si Andrea Cuevas Diman sa Lamitan City, Basilan na kung tutuusin ay anak ng isang sapatero at isang kaminera na walang pambayad ng ransom.

Si Diman ay pinalaya ng Abu Sayyaf matapos ang pakikipagnegosasyon na isinagawa ni Lamitan City Mayor Rhoderick Furigay dakong alas-11 ng tanghali nitong Martes.

“It’s a desperate act pati batang kalye kinikidnap nila,” ani Arevalo matapos na mabatid na isang batang kalye si Diman na mga kapwa batang lansangan na mahihirap rin sa lungsod ng Lamitan ang kalaro ng mangyari ang pagdukot dito.

Nabatid na basta kumita umano ng pera ang Abu Sayyaf kahit na maliit na halaga lamang ng ransom ay payag na ang mga ito.

“The Abu Sayyaf has resorted to kidnapping low-key victims. This should be a cause for alarm on the part of the public,” ani Arevalo na hiningi ang suporta ng taumbayan upang masupil ang tala­mak na kidnapping na kinasasangkutan ng ban­didong grupo. (Joy Cantos)