Daan-daang bulalakaw sasalubong sa Bagong Taon
Sasabayan ang makulay at maingay na ‘fireworks display’ na pagsalubong sa Bagong Taon ng daan-daang ‘meteor shower’ sa kalangitan na tatagal ng limang araw mula Enero 1 hanggang 5.
Sa obserbasyon ng Philippine Atmospheric Geophysical and Astronomical Services Administration (Pagasa), bibisitahin ang mundo ng “Quandrantid meteors” na taun-taong nagpapakita.
Sinabi ni Pagasa astronomy chief, Dr. Cynthia Celebre, aabot sa 40 bulalakaw ang guguhit sa kalangitan sa loob ng bawat oras. Pinakamarami umanong masisilayan sa himpapawid ang mga bulalakaw sa Enero 3 pagkatapos ng hatinggabi.
May bilis ang mga bulalakaw ng 40 kilometro kada segundo sa pagtama nito sa atmospera ng daigdig.
Sa pagtataya rin ng Pagasa, unang magaganap ang taunang “eclipse” ng araw sa Enero 26. Makikita ito sa Metro Manila bilang partial eclipse dakong alas-4:55 ng hapon at magiging ganap na eclipse dakong alas-5:51 ng hapon.
Samantala, umabot na sa Eastern Samar ang “low pressure area (LPA)” na pinangangambahang maging isang ganap na bagyo. Huling namataan ito ng Pagasa dakong alas-2 ng kahapon ng madaling araw may 190 kilometro sa timog silangan ng bayan ng Guiuan ng naturang lalawigan.
- Latest
- Trending
