Dela Paz hawak na ng Senado

Tinupad kahapon ni dating National Police comptroller Eliseo Dela Paz ang kanyang pangako kay Sen. Panfilo Lacson na magpa­pakita sa Senado bago ang nakatakdang hearing ng Senate Committee on Foreign Relations ni Sen. Miriam Defensor-Santiago ngayong alas-10 ng umaga.

Kasama si Lacson, du­mating kahapon ng hapon si dela Paz sa Senado ma­tapos magkita ang dalawa sa isang building sa Makati.

Agad na idiniretso si dela Paz sa tanggapan ni Senate Sergeant-at-Arms Jose Balajadia.

Sinigurado ni dela Paz na sasagot siya sa tanong ng mga senador kaugnay sa pagdadala ng P6.9 mil­yon sa Moscow.

Naniniwala si Lacson na siya ang napili ni dela Paz na kontakin dahil dati siyang hepe ng Philippine National Police.

Napagdesisyunan din kagabi na manatili na la­mang si dela Paz sa Sena­do dahil na rin sa bisa ng warrant of arrest laban sa kanya. Inihayag din ni Lac­son na sa kanyang opi­nion, mas mabuting huwag na munang paharapin sa hearing ngayon ang asawa ni dela Paz na inimbitahan din ng komite. 

Bukod kay dela Paz, ha­harap din ngayon sa Sena­do ang ibang heneral na nagtungo sa Russia. (Malou Escudero)