Lantsa lumubog: 39 patay!

Tatlumpu’t siyam ka­tao ang kumpirmadong nasawi habang 76  ang nailigtas makaraang ak­sidenteng lumubog ang isang pampasaherong lantsa na binalya ng ma­lakas na alon at hangin sa karagatan ng Masbate kahapon ng hapon.

Ayon kay Masbate Provincial Police Office (PPO) Director Sr. Supt. Reuben Theodore Sin­dac, dakong ala-1 ng ha­pon nitong Martes nang lumubog ang lantsang Don Dexter Cathlyn  sa karagatang sakop ng Brgy. Magcaragit, Dima­salang ng lalawigang nabanggit.

Biyaheng Bulan ang lantsa galing sa Dima­salang nang biglang hampasin ng super lakas na hangin at alon may 5 kilometro ang layo mula sa dalampasigan.

Kabilang sa nareko­ber na bangkay ay tatlong babae at tatlong sanggol.

Sa inisyal na imbes­ti­gasyon, ayon kay Sindac, nabatid na may 119 ang pasahero na nasa manifesto ng nasabing lantsa ng mangyari ang insi­dente.

Kabilang naman sa sinisilip na anggulo sa paglubog nito ay ‘overloading ‘habang patuloy ang isinasagawang search and rescue operations sa apat pang nawawalang biktima.